mehr-o-ulfat se ma.al-e-tahzib
ḳhaksari hai kamal-e-tahzib
hai vo ara.ish-e-husn-e-batin
jis ko kahte hain jamal-e-tahzib
kam nahin mardumak-e-chashm se kuchh
ruḳh-e-insan pe ḳhal-e-tahzib
aj-kal ham men agar sach puchho
shakl anqa hai misal-e-tahzib
kabhi hota nahin bad-vaz.a ka ḳhauf
hai ajab jah-o-jalal-e-tahzib
ruḳh pe karta hai matanat paida
dil men aate hi ḳhayal-e-tahzib
apne matlab ka jahan kuchh ho lagav
nahin rahta hai ḳhayal-e-tahzib
qaum ka apne na ghaTta vo uruuj
ho na jaata jo zaval-e-tahzib
jam-e-jam se hai kahin pur-tamkin
bazm-e-ḳhullat men sifal-e-tahzib
us ka ḳhuun karte hain jo nahaq-kosh
un ki gardan pe vabal-e-tahzib
murda qaumon ke liye ab-e-hayat
banta jaata hai zulal-e-tahzib
badr ban ja.ega chande men ‘habib’
haq ne chaha to hilal-e-tahzib
Leave a Reply