pesh jo aaya sar-e-sahil-e-shab batlaya
mauj-e-gham ko bhi magar mauj-e-tarab batlaya
hai batane ki koi chiiz bhala nam-o-nasab
ham ne puchha na kabhi nam-o-nasab batlaya
rang mahfil ka ajab ho gaya jis dam us ne
ḳhamushi ko bhi miri husn-e-talab batlaya
dil ko duniya se sarokar kabhi tha hi nahin
aankh ne bhi magar is ruḳh ko ajab batlaya
ye udasi ka sabab puchhne vaale ‘ajmal’
kya karenge jo udasi ka sabab batlaya
Leave a Reply