Nazar Ne Kaam Kiya Dil Ke Tarjuman Ki Tarah

Riyasat Ali Taj

nazar ne kaam kiya dil ke tarjuman ki tarah

nigahen kah ga.i sab hal-e-dil zaban ki tarah

kiye the be-ḳhudi-e-shauq men jahan sajde

vahi zamin nazar aati hai asman ki tarah

nazar mili hai to pahchan jaa.e ahl-e-chaman

dikha.i dete hain gulchin bhi baghban ki tarah

kitab-e-zist ka shiraza-band koi nahin

bikhar ga.i hai kisi nazm-e-bostan ki tarah

na barg-o-bar na shadabiyan na ghuncha-o-gul

yahi bahar agar hai to hai ḳhizan ki tarah

tumhare shahr men muddat se ye tamanna hai

dikha.i de koi be-mehr mehrban ki tarah

ḳhuda-gavah ki ik umr ka asasa hai

na kyuun aziiz rakhun ilm-o-fan ko jaan ki tarah

kise bata.en ki the ham bhi ham-nashin ai ‘saif’

vo ‘taj’ bhuul ga.e yad-e-raftagan ki tarah