KHwab Aise Ki Gai Raat Darane Lag Jaen

ḳhvāb aise ki ga.ī raat Darāne lag jaa.eñ

dard jaage to sulāne meñ zamāne lag jaa.eñ

ham vo nādān havāoñ se vafā kī ḳhātir

apne āñgan ke charāġhoñ ko bujhāne lag jaa.eñ

thoḌe gehūñ abhī miTTī pe rakhe rahne do

vo parinde ki kabhī lauT ke aane lag jaa.eñ

aas mahke jo kisī kho.e jazīre kī kabhī

terī bāñheñ mujhe sāhil pe bulāne lag jaa.eñ

koī dushman na ho in ko to ye īzā-parvar

apne ḳhemoñ pe hī tīroñ ko chalāne lag jaa.eñ

Leave a Comment