Aazad Us Se Hain Ki Bayaban Hi Kyun Na Ho

āzād us se haiñ ki bayābāñ hī kyuuñ na ho

phāḌeñge jeb gosha-e-zindāñ hī kyuuñ na ho

ho shuġhl koī jī ke bahalne ke vāste

rāhat-fazā hai naala o fuġhāñ hī kyuuñ na ho

saudā-e-zulf-e-yār se baaz ā.eñge na ham

majmū-e-havās pareshāñ hī kyuuñ na ho

ehsān-e-tīr-e-yār adā ho sakegā kyā

jaan apnī nazr-e-lazzat-e-paikāñ hī kyuuñ na ho

jiite raheñge vāda-e-sabr-āzmā pe ham

umr apnī misl-e-vaqt-e-gurezāñ hī kyuuñ na ho

‘vahshat’ rukeñ na haath sar-e-hashr dekhnā

us fitna-ḳhū kā gosha-e-dāmāñ hī kyuuñ na ho

Leave a Comment