Nind Ke Bojh Se Palkon Ko Jhapakti Hui Aai

Ameer Imam

niind ke bojh se palkon ko jhapakti hui aa.i

sub.h jab raat ki galiyon men bhaTakti hui aa.i

dida-e-ḳhushk men ik mahi-e-be-ab thi niind

chashma-e-ḳhvab talak aa.i phaḌakti hui aa.i

aur phir kya hua kuchh yaad nahin hai mujh ko

ek bijli thi ki siine men lapakti hui aa.i

aaj kya phir kisi avaz ne bai.at mangi

ye miri ḳhamushi jo paanv paTakti hui aa.i

raat ghabra ga.i suraj se kaha al-madade

vo ba-sad-naz jo zulfon ko jhaTakti hui aa.i

ho ga.i ḳhair tira naam na aaya lab par

ek aahaT tiri ḳhushbu men mahakti hui aa.i

vaqt-e-ruḳhsat miri ankhon ki tarah chup thi jo yaad

ai mire dil tiri manind dhaḌakti hui aa.i