Hatim Ali Mehr
alam-e-hairat ka dekho ye tamasha ek aur
yaar ne aine men apna sa dekha ek aur
marne valon men raha jaata hai jiita ek aur
nim-bismil huun main qatil haath puura ek aur
rafta rafta dil ko dil se raah ho jaae kahin
un se milne ka rahe poshida rasta ek aur
ek to missi ka naqsha jam raha hai shaam se
paan ki laali ne rang apna jamaya ek aur
main ne maana aap ne bose diye main ne liye
vo kahan nikli jo hai meri tamanna ek aur
yaad men ik shokh punjabi ke rote hain jo ham
aj-kal punjab men bahta hai dariya ek aur
un ka jhumar dekh kar kahne lage ahl-e-zamin
dekh le ai asman aqd-e-surayya ek aur
jite-ji to daman-e-sahra ka khilat mil gaya
baad marne ke mile un ka dupatta ek aur
bazm se saaqi ke ham se rind nikle pak-saf
apna ab kaabe men pahunchega musalla ik aur
shairan-e-asr ki tujh ko to hai paighambari
bu-salimi bhi hue ai ‘mehr’ paida ek aur
Leave a Reply