Arif Imam
halat-e-harf kis ne jaani hai
ye jahan ḳhugar-e-ma.ani hai
kya lage qimat-e-qaba-e-suḳhan
ye na.i ho ke bhi purani hai
ek duniya thii, jis ke malbe se
ek duniya mujhe banani hai
raah men hai badan ki ik divar
jo mujhe naḳhunon se Dhani hai
ye jahan raqs men nahin yunhi
sab mire ḳhuun ki ravani hai
aur kuchh din hai ye fareb-e-visal
aur kuchh din ye ḳhush-gumani hai
surḳh ho ai miri qamiz-e-safed
apni qimat mujhe baḌhani hai
haan tabi.at to Thiik hai meri
ik zara ranj-e-ra.egani hai
Leave a Reply