Na Ada Mujhse Hua Us Sitam-Ijad Ka Haq

na ada mujh se hua us sitam-ijad ka haq

meri gardan pe raha ḳhanjar-e-bedad ka haq

naseho gar na sunun main miri qismat ka qusur

tum ne irshad kiya jo ki hai irshad ka haq

yaad to haq ki tujhe yaad hi par yaad rahi

yaar dushvar hai vo yaad jo hai yaad ka haq

apni tasvir pe sadqe tire sadqe kar use

isi surat se ada hovega bahzad ka haq

haq ko batil koi kis tarah se kah de ai but

kahin saani nahin us husn-e-ḳhuda-dad ka haq

jan-kani pesha ho jis ka vo lahaq hai tera

tujh pe shirin hai na ḳhusrav ka na farhad ka haq

bar-e-ehsan se nahin sar bhi utha sakta huun

mere sar par hi raha us mire jallad ka haq

sun ke kahta hai yahan kaun hai sunta mat sun

sunne vaala hi suna is miri fariyad ka haq

vahi insan hai ‘ehsan’ ki jise ilm hai kuchh

haq ye hai baap se afzun rahe ustad ka haq

Leave a Comment