Tahir Adeem
kahin divar hai to dar gha.eb
aur kahin par hamara ghar gha.eb
ham-safar hai kahin safar gha.eb
hai safar gar to ham-safar gha.eb
ai ḳhuda kaun sa tilism hai ye
jism maujud hain ye sar gha.eb
shauq-e-parvaz hai sabhi men magar
ta.iran-e-chaman ke par gha.eb
asman bhi nahin raha sar par
us pe paanv se hai safar gha.eb
main bhi bai’at karun ba-dast-e-hunar
dard-e-dil ko jigar se kar gha.eb
mujh pe paḌti nahin koi bhi nazar
main bhi mahfil men huun magar gha.eb
tum raho aankh men to behtar hai
duur hon gar to bahr-o-bar gha.eb
ya to maujud hi nahin vo raha
ya koi aankh se nazar gha.eb
ishq ke baam par vo hai maujud
kasa-e-sham se qamar gha.eb
qaht kaisa paḌa hai ab ke baras
dast-e-fan-kar se hunar gha.eb
samne manzilen sabhi madum
muḌ ke dekhun to charagar gha.eb
zaḳhm ‘tahir-adim’ kaise bhare
har dava se hua asar gha.eb
Leave a Reply