Bijli Kahin Girae Zamane Guzar Gae

Suhaib Farooqui

bijli kahin gira.e zamane guzar ga.e

jalva use dikha.e zamane guzar ga.e

tum se nigah haTti na thi vo bhi vaqt tha

lamhat ab vo aa.e zamane guzar ga.e

kyon chhante ho ḳhaak miyan ku-e-yar ki

us ko to ḳhat jala.e zamane guzar ga.e

kaise kahen ki rabta us se raha nahin

jis ko hamen bhula.e zamane guzar ga.e

ik baar us ki diid ki ham ko hai aarzu

yaron fareb khaa.e zamane guzar ga.e

ye kis guman men ho hamen zer karke tum

ham ko to sar jhuka.e zamane guzar ga.e

himmat hai ab na quvvat-e-iman-o-agahi

vo kashtiyan jala.e zamane guzar ga.e

aati hai ab chaman se ye ḳhushbu ‘suhaib’ kyon

jab ki bahar aa.e zamane guzar ga.e