Sher Singh Naaz Dehlvi
kuchh ishare vo sar-e-bazm jo kar jaate hain
navak-e-naz kaleje men utar jaate hain
ahl-e-dil rah-e-adam se bhi guzar jaate hain
nam-leva tire be-ḳhauf-o-ḳhatar jaate hain
safar-e-zist hua ḳhatm na socha lekin
ham ko jaana hai kahan aur kidhar jaate hain
nigah-e-lutf men hai uqda-kusha.i muzmar
kaam bigḌe hue bandon ke sanvar jaate hain
qabil-e-did hai mahshar men ḳhajalat un ki
do qadam chalte hain rukte hain Thahar jaate hain
ḳhuub badnam kiya apni siyahkari ne
ungliyan uThti hain mahshar men jidhar jaate hain
aankh khul jaati hai chaunk uThte hain sone vaale
vo dabe paanv jo turbat se guzar jaate hain
charagar hajat-e-marham nahin un ko aslan
zaḳhm-e-dil lazzat-e-isar se bhar jaate hain
ah-e-sozan se jo nikle the sitare shab-e-gham
ban ke taare vahi gardun pe bikhar jaate hain
aaj tak lauT ke aaya na jahan se koi
ham-safiran-e-jahan ham bhi udhar jaate hain
bahr-e-gham men vahi phanste hain jo hote hain giran
jo subuk hote hain vo paar utar jaate hain
kushta-e-naz tira kyuun na zamin par loTe
dagh-e-dil jitne hain is tarah vo bhar jaate hain
Leave a Reply