abbas-ali-khan-bekhud

Be-Wajh Nahin Un Ka Be-Khud Ko Bulana Hai

be-vaj.h nahin un ka be-khud ko bulana hai

aina-e-hairat se mahfil ko sajana hai

yaar gham-e-hasti ka hai tazkira la-hasil

majbur ka jiina hi ik baar uthana hai

mujh se jo sar-e-mahfil tum aankh churate ho

kya raz-e-mohabbat ko afsana banana hai

halat ke taghayyur par ho matam-e-mazi kyuun

ik vo bhi zamana tha ik ye bhi zamana hai

hai gosha-e-tanhai manzur mujhe ‘bekhud’

is bazm men jaana to ji aur jalana hai

More Poems

Leave a Comment