vo ruḳhsat ki ghaḌi vo dida-e-nam yaad aate hain
na jaane aaj kyuun bhule hue gham yaad aate hain
ye chashm-e-dost ki sazish nahin to aur phir kya hai
ki mere mundamil zaḳhmon ke marham yaad aate hain
hua hai jab se dil said-e-sitam-ha-e-gham-e-dauran
vo yaad aate to hain lekin bahut kam yaad aate hain
yahan ham gham ghalat karne ko aa.e the magar saaqi
qayamat hai ki maiḳhane men bhi gham yaad aate hain
koi jab chheḌta hai qissa-e-dar-o-rasan ‘qaisar’
to divanon ko un ki zulf ke ḳham yaad aata hai
Leave a Reply