Tez-Rau Pani Ki Tikhi Dhaar Par Bahte Hue

tez-rau paanī kī tīkhī dhaar par bahte hue

kaun jaane kab mileñ is baar ke bichhḌe hue

apne jismoñ ko bhī shāyad kho chukā hai aadmī

rāstoñ meñ phir rahe haiñ pairahan bikhre hue

ab ye aalam hai ki merī zindagī ke raat din

sub.h milte haiñ mujhe aḳhbār meñ lipTe hue

an-ginat chehroñ kā bahr-e-be-karāñ hai aur maiñ

muddateñ guzrīñ haiñ apne-āp ko dekhe hue

kin rutoñ kī aarzū shādāb rakhtī hai inheñ

ye ḳhizāñ kī shaam aur zaḳhmoñ ke ban mahke hue

kaaT meñ bijlī se tīkhī baal se bārīk-tar

zindagī guzrī hai is talvār par chalte hue

Leave a Comment