tez-rau paani ki tikhi dhaar par bahte hue
kaun jaane kab milen is baar ke bichhḌe hue
apne jismon ko bhi shayad kho chuka hai aadmi
raston men phir rahe hain pairahan bikhre hue
ab ye aalam hai ki meri zindagi ke raat din
sub.h milte hain mujhe aḳhbar men lipTe hue
an-ginat chehron ka bahr-e-be-karan hai aur main
muddaten guzrin hain apne-ap ko dekhe hue
kin ruton ki aarzu shadab rakhti hai inhen
ye ḳhizan ki shaam aur zaḳhmon ke ban mahke hue
kaaT men bijli se tikhi baal se barik-tar
zindagi guzri hai is talvar par chalte hue
Leave a Reply