kaTte hi sang-e-lafz girani nikal paḌe
shisha uTha ki ju-e-ma.ani nikal paḌe
pyaso raho na dasht men barish ke muntazir
maaro zamin pe paanv ki paani nikal paḌe
mujh ko hai mauj mauj girah bandhne ka shauq
phir shahr ki taraf na ravani nikal paḌe
hote hi shaam jalne laga yaad ka alaao
aansu sunane dukh ki kahani nikal paḌe
‘sajid’ tu phir se ḳhana-e-dil men talash kar
mumkin hai koi yaad purani nikal paḌe
Leave a Reply