Basir Sultan Kazmi
kahan milega vo mujh se agar yahan bhi rahe
miri dua hai ki vo ḳhush rahe jahan bhi rahe
dil-e-ḳharab ye ḳhvahish tiri ajab hai ki vo
sitam bhi kam na kare aur mehrban bhi rahe
abhi zamin pe jannat nahin bani yaaro
jahan ke qisse sunate ho ham vahan bhi rahe
raha hamesha hi saman muḳhtasar apna
musafiron ki tarah ham rahe jahan bhi rahe
jo saath chalne ke bhi mustahiq na the ‘basir’
kuchh aise log yahan mir-e-karvan bhi rahe
Leave a Reply