kavish-e-besh-o-kam ki baat na kar
chhoḌ dam-o-diram ki baat na kar
dekh kya kar rahe hain ahl-e-zamin
asman ke sitam ki baat na kar
apni ah-o-fughan ke soz ko dekh
saaz ke zer-o-bam ki baat na kar
yuun bhi tufan-e-gham hazaron hain
ishq ki chashm-e-nam ki baat na kar
saḳht uljhi hain ziist ki rahen
zulf ke pech-o-ḳham ki baat na kar
aaj sud-o-ziyan ka sauda hai
aaj dair-o-haram ki baat na kar
dekh farhad ki tunuk-noshi
vus.at-e-jam-e-jam ki baat na kar
ham ne dekha hai zarf-e-ahl-e-karam
ham se ahl-e-karam ki baat na kar
shab ki ranginiyon ka zikr na chheḌ
halat-e-sub.h-dam ki baat na kar
aaj mat chheḌ gham ke afsane
aaj ai dost gham ki baat na kar
chhin na jaa.e tira tabassum-e-lab
mere dard-o-alam ki baat na kar
Leave a Reply