agar kuchh hosh ham rakhte to mastane hue hote
pahunchte ja lab-e-saqi kuun paimane hue hote
abas in shahriyon men vaqt apna ham kiye zaae
kisi majnun ki sohbat baith divane hue hote
na rakhta main yahan gar ulfat-e-laila nigahon kuun
to majnun ki tarah aalam men afsane hue hote
agar ham ashna hote tiri begana-khui siin
bara-e-maslahat zahir men begane hue hote
zi-bas kafir-adayon ne chalae sang-e-be-rahmi
agar sab jama karta main to but-khane hue hote
na karta zabt agar main girya-e-be-ikhtiyari kuun
guzarta jis taraf ye puur virane hue hote
nazar chashm-e-kharidari siin karta dilbar-e-nadan
agar qatre mire aansu ke durdane hue hote
mohabbat ke nashe men khaas insan vaste varna
farishte ye sharaben pi ki mastane hue hote
evaz apne gareban ke kisi ki zulf haat aati
hamare haat ke panje magar shane hue hote
tiri shamshir-e-abru siin hue sanmukh va illa na
ajal ki tegh siin jyuun aara dandane hue hote
maza jo ashiqi men hai so mashuqi men hargiz niin
‘siraj’ ab ho chuke afsos parvane hue hote
Leave a Reply