lete hi dil jo ashiq-e-dil-soz ka chale
tum aag lene aae the kya aae kya chale
tum chashm-e-surmagin ko jo apni dikha chale
baithe bithae khaak men ham ko mila chale
divana aa ke aur bhi dil ko bana chale
ik dam to thahro aur bhi kya aae kya chale
ham lutf-e-sair-e-bag-e-jahan khaak uda chale
shauq-e-visal dil men liye yaar ka chale
ghairon ke saath chhod ke tum naqsh-e-pa chale
kya khuub phuul gor pe meri chadha chale
dikhla ke mujh ko nargis-e-bimar kya chale
avara misl-e-ahu-e-sahra bana chale
ai gham mujhe tamam shab-e-hijr men na kha
rahne de kuchh ki subh ka bhi nashta chale
bal-be ghurur-e-husn zamin par na rakkhe paanv
manind-e-aftab vo be-naqsh-e-pa chale
kya le chale gali se tiri ham ko juun nasim
aae the sar pe khaak udane uda chale
afsos hai ki saya-e-murgh-e-hava ki tarah
ham jis ke saath saath chalen vo juda chale
kya dekhta hai haath mira chhod de tabib
yaan jaan hi badan men nahin nabz kya chale
qatil jo tere dil men rukavat na ho to kyuun
ruk ruk ke mere halq pe khanjar tira chale
le jaaen tere kushte ko jannat men bhi agar
phir phir ke tere ghar ki taraf dekhta chale
aluda chashm men na hui surme se nigah
dekha jahan se saaf hi ahl-e-safa chale
roz-e-azal se zulf-e-moambar ka hai asiir
kya ud ke tujh se tair-e-nikhat bhala chale
saath apne le ke tausan-e-umr-e-ravan ko aah
ham is sara-e-dahar men kya aae kya chale
suljhai zulfen kya lab-e-dariya pe aap ne
har mauj misl-e-mar-siyah tum bana chale
duniya men jab se aae raha ishq-e-gul-rukhan
ham is jahan men misl-e-saba khaak uda chale
qatil se dakhl kya hai ki jan-bar ho apna hosh
gar ud ke misl-e-taer rang-e-hina chale
fikr-e-qanaat un ko mayassar hui kahan
duniya se dil men le ke jo hirs-o-hava chale
is ru-e-atishin ke tasavvur men yad-e-zulf
yaani ghazab hai aag lage aur hava chale
ai ‘zauq’ hai ghazab nigah-e-yar al-hafiz
vo kya bache ki jis pe ye tir-e-qaza chale
Leave a Reply