Aziz Nabeel
zamin ki aankh se manzar koi utarte hain
hava ka aks chalo ret par ubharte hain
ḳhud apne hone ka inkar kar chuke hain ham
hamari zindagi ab dusre guzarte hain
tumhari jiit ka tum ko yaqin aa jaa.e
so ham tumhare liye baar baar harte hain
talash hai hamen kuchh gum-shuda baharon ki
guzar chuke hain jo mausam unhen pukarte hain
chamak rahe hain mire ḳhema-e-suḳhan har-su
harif dekhiye shab-ḳhun kaise marte hain
ye kaisi hairaten darpesh hain aziz-‘nabil’
zara Thaharte hain aseb-e-jan utarte hain
Leave a Reply