bhar ga.e zaḳhm to kya dard to ab bhi koi hai
aankh roti hai to rone ka sabab bhi koi hai
pi ga.i ye miri tanha.i mire dil ka lahu
qatra-e-ashk pe ye jashn-e-tarab bhi koi hai
maut se talḳh hai shayad tiri rahmat ka azaab
jis ko kahte hain ghazab aisa ghazab bhi koi hai
roz gulshan men yahi puchhti phirti hai saba
tere phulon men mira ghuncha-e-lab bhi koi hai
us ke pahlu se bahut duur mire dil ke qarib
aisa lagta hai ki baiTha hua ab bhi koi hai
jo alamat ho tire halqa-e-ushshaq ke biich
tujh se nisbat ke liye aisa laqab bhi koi hai
‘shahid’ us silsila-e-ishq se vabasta huun
jis men ḳhud ‘mir’ sa ik ali-nasab bhi koi hai
Leave a Reply