haidar-ali-aatish

Hasrat-E-Jalwa-E-Didar Liye Phirti Hai

hasrat-e-jalva-e-didar liye phirti hai

pesh-e-rozan pas-e-divar liye phirti hai

is mashaqqat se use khaak na hoga hasil

jaan abas jism ki be-kar liye phirti hai

dekhne deti nahin us ko mujhe be-hoshi

saath kya apne ye divar liye phirti hai

kisi fasiq ke tu munh ko na karegi kaala

kyuun siyahi ye shab-e-tar liye phirti hai

tu nikalta nahin shamshir-ba-kaf ai qatil

maut mere liye talvar liye phirti hai

mal-e-muflis mujhe samjha hai junun ne shayad

vahshat-e-dil sar-e-bazar liye phirti hai

kaaba o dair men vo khana-barandaz kahan

gardish-e-kafir-o-din-dar liye phirti hai

ranj likkha hai nasibon men mire rahat se

khvab men bhi havas-e-yar liye phirti hai

chaal men is ki sarapa hai kisi ki taqlid

kabk ko yaar ki raftar liye phirti hai

dar-e-yar aae thikane lage mitti meri

dosh par apne saba baar liye phirti hai

hanste hain dekh ke majnun ko gul-e-sahrai

pa-barahna talab-e-khar liye phirti hai

saaya sa husn ke ham-rah hai ishq-e-bebak

saath ye jins-e-kharidar liye phirti hai

kisi surat se nahin jaan ko farar ai ‘atish’

tapish-e-dil mujhe lachar liye phirti hai

More Poems

Leave a Comment