Bana Hai Apne Aalam Mein Wo Kuchh Aalam Jawani Ka

Nazeer Akbarabadi

bana hai apne aalam men vo kuchh aalam javani ka

ki umr-e-khizr se behtar hai ek ik dam javani ka

nahin budhon ki dadhi par miyan ye rang vasme ka

kiya hai un ke ek ek baal ne matam javani ka

ye budhe go ki apne munh se shaikhi men nahin kahte

bhara hai aah par in sab ke dil men gham javani ka

ye piran-e-jahan is vaste rote hain ab har dam

ki kya kya in ka hangama hua barham javani ka

kisi ki piith kubdi ko bhala khatir men kya laave

akad men naujavani ke jo maare dam javani ka

sharab o gul-badan saaqi maze aish-o-tarab har-dam

bahar-e-zindagi kahiye to hai mausam javani ka

‘nazir’ ab ham udate hain maze kya kya aha-ha-ha

banaya hai ajab allah ne aalam javani ka