Khwaja Shauq
ruuh ke zaḳhm se chehre pe tavana.i hai
be-hisi shiddat-e-ehsas ki gahra.i hai
har nafas tishnagi-e-dard pazira.i hai
dil jise kahte hain ik mahshar-e-tanha.i hai
ḳhud-faramosh huun main ishq faramosh nahin
bhulta tujh ko to kahta tiri yaad aa.i hai
vaqt ka jabr hai majburi-e-dil se bhi siva
varna asl kise tab-e-shakeba.i hai
thi nazar jalva hi jalva tire nazzare tak
ab nazar kya hai faqat tohmat-e-bina.i hai
hanste hanste kabhi aansu nikal aa jaate the
pi ga.e ab ka.i aansu to hansi aa.i hai
kar ga.i shahr ki tahzib taraqqi kitni
qatilon ko bhi yahan naz-e-masiha.i hai
ḳhush-mizaji se na kha ahl-e-chaman ki dhoka
dil se begane hain chehron se shanasa.i hai
daad de kaun miri be-sar-o-samani ki
har koi apni tabahi ka tamasha.i hai
sabr hi sabr hai dastur-e-mohabbat ki shaan
jabr-e-mahbub pe a.in-e-zuleḳha.i hai
Leave a Reply