Ruh Ke zaKHm Se Chehre Pe Tawanai Hai

ruuh ke zaḳhm se chehre pe tavānā.ī hai

be-hisī shiddat-e-ehsās kī gahrā.ī hai

har nafas tishnagī-e-dard pazīrā.ī hai

dil jise kahte haiñ ik mahshar-e-tanhā.ī hai

ḳhud-farāmosh huuñ maiñ ishq farāmosh nahīñ

bhūltā tujh ko to kahtā tirī yaad aa.ī hai

vaqt kā jabr hai majbūri-e-dil se bhī sivā

varna asl kise tāb-e-shakebā.ī hai

thī nazar jalva hī jalva tire nazzāre tak

ab nazar kyā hai faqat tohmat-e-bīnā.ī hai

hañste hañste kabhī aañsū nikal aa jaate the

pī ga.e ab ka.ī aañsū to hañsī aa.ī hai

kar ga.ī shahr kī tahzīb taraqqī kitnī

qātiloñ ko bhī yahāñ nāz-e-masīhā.ī hai

ḳhush-mizājī se na khā ahl-e-chaman kī dhokā

dil se begāne haiñ chehroñ se shanāsā.ī hai

daad de kaun mirī be-sar-o-sāmānī kī

har koī apnī tabāhī kā tamāshā.ī hai

sabr hī sabr hai dastūr-e-mohabbat kī shaañ

jabr-e-mahbūb pe ā.īn-e-zuleḳhā.ī hai

Leave a Comment