tum ne jab ghar men andheron ko bula rakkha hai
uth ke so jaao ki darvaze pe kya rakkha hai
har kisi shakhs ke rone ki sada aati hai
phir kisi shakhs ne basti ko jaga rakkha hai
apni khatir bhi koi lafz tarashen yaaro
ham ne kis vaste yuun khud ko bhula rakkha hai
dekhne ko hai badan aur haqiqat ye hai
ek malba hai jo muddat se utha rakkha hai
tu agar tha to bahut duur the ham tujh se ki ab
tu nahin hai to tujhe paas bitha rakkha hai
ham kisi tarah tujhe dhund len mumkin hi nahin
tu ne har raah ko sahra se mila rakkha hai
Leave a Reply