Hafeez Jaunpuri
mizhgan hain ghazab abru-e-ḳhamdar ke aage
ye tiir baras paḌte hain talvar ke aage
ḳhair us men hai vaa.iz ki kabhi mai ki mazammat
karna na kisi rind-e-ḳhush-atvar ke aage
kahna miri balin pe ki asar bure hain
karta hai ye baten koi bimar ke aage
shikve the bahut un se shikayat thi bahut kuchh
sab bhuul ga.e vasl ki shab pyaar ke aage
ḳhalvat men jo puchho to kahun dil ki haqiqat
mujh se na mira haal suno chaar ke aage
a.ina abhi dekh ke ḳhud-bin to vo ho len
ḳhud a.enge phir talib-e-didar ke aage
qarun ka ḳhazana ho ki hatim ki saḳhavat
sab kuchh hai magar kuchh nahin mai-ḳhvar ke aage
kya mujh ko Dara.engi tiri tez nigahen
ye aankh jhapakti nahin talvar ke aage
divanon men divane ‘hafiz’ aap hain varna
hushiyar se hushiyar hain hushiyar ke aage
Leave a Reply