dard vaale ho to phir aisa karo
saath kuchh hamdard bhi rakkha karo
apna begana na tum dekha karo
har kisi se maslahat barta karo
dusron ke dard ki chhoḌo miyan
pahle apne dard ka chara karo
go bulandi ho ki pasti har jagah
zehn-o-dil donon khule rakha karo
is qadar ḳhamoshiyan achchhi nahin
log kya sochenge kuchh socha karo
jis ko jo hona hai ho hi ja.ega
kaun kyon kaise hai kam socha karo
saaf dikh ja.enge chehre ke nuqush
a.ina nazdik se dekha karo
ham-safar honge to bichhḌenge zarur
is liye ik ik safar tanha karo
har-nafas ‘asi’ ḳhuda ki den hai
har-nafas ik chaukasi barta karo
Leave a Reply