Mere Hisse Mein Be-Dili Aai

Syed Ahmed Shameem

mere hisse men be-dili aa.i

maut aa.i na zindagi aa.i

koi manzar khula na ankhon men

jo bhi rut aa.i shabnami aa.i

lahr si duur tak uThi dil men

aaj phir yaad aap ki aa.i

koi lamha chamak uTha shayad

varna ankhon men kyuun nami aa.i

aa.ina dekha dekh kar roya

ḳhud ko socha to phir hansi aa.i

ab to har shahr shahr-e-maqtal hai

jo hua aa.i chiḳhti aa.i

agahi kar ga.i bahut gumrah

kaam aa.i to ashiqi aa.i

shab bulati hai vahshaton ko ‘shamim’

kya qayamat ki chandni aa.i