Tariq Qamar
us ne ik baar bhi puchha nahin kaisa huun main
ḳhud ko bhi jis ke liye haar ke baiTha huun main
phuul hone ki saza ḳhuub mili hai mujh ko
shaḳh se TuuT ke gul-dan men rakkha huun main
chalta rahta huun to lagta hai koi saath men hai
thak ke baiThunga to yaad aa.ega tanha huun main
gum hua ḳhud men to ik nuqta-e-mauhum hua
munkashif hote hi atraf pe chhaya huun main
is saliqe se mujhe qatl kiya hai us ne
ab bhi duniya ye samajhti hai ki zinda huun main
phir achanak ye hua jiit ga.i ye duniya
main samajhta tha ki bas jitne vaala huun main
vo bhi rasman yahi puchhega ki kaise ho tum
main bhi hanste hue kah dunga ki achchha huun main
Leave a Reply