ahsan-marahravi

Yahan Baghair-Fughan Shab Basar Nahin Hoti

yahan baghair-fughan shab basar nahin hoti

vahan asar nahin hota ḳhabar nahin hoti

ḳhalish jigar men hai dil ko ḳhabar nahin hoti

chubhi hai phans idhar se udhar nahin hoti

abas hi kal ke liye iltiva-e-mashq-e-ḳhiram

qayamat aaj hi kyuun fitna-gar nahin hoti

jo un se duur hai us ke liye hain chashm-e-ba-rah

ham un ke paas hain ham par nazar nahin hoti

ajal ko rokiye kya kah ke un ke aane tak

ki ab to baat bhi ai chara-gar nahin hoti

vo aa gae hain to aansu zarur ponchhenge

ab aankh kyuun miri ashkon se tar nahin hoti

kamal-e-be-hunari se ghani huun main ‘ahsan’

mujhe zarurat-e-arz-e-hunar nahin hoti

More Poems

Leave a Comment