faqat ik shaghl bekari hai ab bada-kashi apni
vo mahfil uTh ga.i qaa.em thi jis se sarḳhushi apni
ḳhuda ya na-ḳhuda ab jis ko chaho baḳhsh do izzat
haqiqat men to kashti ittifaqan bach ga.i apni
bas ab guzrenge rah-e-zindagi se be-niyazana
agar tere karam par munhasir hai zindagi apni
bahut ji chahta hai ye faqat naqs-e-basarat ho
baḌi sur.at se duniya kho rahi hai dilkashi apni
ḳhamoshi par bhi hai un ko guman arz-e-tamanna ka
zaban-e-hal se kuchh kah ga.i varaftagi apni
agar tum hans diye ahval-e-dil par kya ta.ajjub hai
ki main ḳhud bhi ba-mushkil zabt karta huun hansi apni
hui hain barishen sang-e-malamat ki bahut lekin
rahe vaz-e-junun qaa.em hai shorida-sari apni
Leave a Reply