Asad Rizvi
vo ek shaḳhs jo manzil bhi rahguzar bhi hai
nishat-o-kaif men Duuba hai gham-gusar bhi hai
majaz aur haqiqat ka aa.ina ban kar
hamari zaat yahan lail bhi nahar bhi hai
tumhare kamre men gulshan ka rang-rup mila
yahan to mez pe phulon ke saath ḳhaar bhi hai
tumhari zaat se is dil ka rabta bhi nahin
tumhari yaad men dil mera be-qarar bhi hai
fasil-e-ab pe Thahri hai chandni ki dulhan
shafaq ke shane pe zulfon ka abshar bhi hai
‘asad’ vo kaisa tilismi vajud rakhta hai
usi se bughz-o-adavat usi se pyaar bhi hai
Leave a Reply