Iffat Abbas
hai ye shahr-e-ishq yaan ab-o-hava kuchh aur hai
surḳh rangat hai zamin ki aur faza kuchh aur hai
yaan junun hai karvan-e-shauq ko bang-e-rahil
ai musafir ye payam-e-naqsh-e-pa kuchh aur hai
hai juda is shahr-e-dil men lazzat-e-ranj-o-alam
is jagah ḳhun-e-jigar ka za.iqa kuchh aur hai
arif-e-kamil hain in sahraon ke sahra-navard
yaan to har majnun ka andaz-o-ada kuchh aur he
zikr ki tamsil har tansil ki ta.abir hai
lutf-e-jannat aur hai ab-e-baqa kuchh aur hai
regzar-e-hijr men ehsas ke zamzam nihan
is jagah to tishnagi ka silsila kuchh aur hai
tu jo nau-varid hai sun yaan aish-e-hasti hai juda
husn ki sarkar men lafz-e-fana kuchh aur hai
dosh par aghosh men pahlu men haidar kab na the
dast-e-mursal par bulandi ka maza kuchh aur hai
ahl-e-radd-o-kad ne sau tafsir ki ik lafz ki
par na samjhe ki nabi ka mudda.a kuchh aur hai
sun kisi majzub se ek baar rudad-e-ghadir
ḳhum ke mimbar par ali ka martaba kuchh aur hai
surḳh-ru ho jaa.e tujh se da.ava-e-ulfat shahab
ashiqon ke zinda rahne ki ada kuchh aur hai
Leave a Reply