dasht se patthar uTha kar shahr men laa.e ho kyon
ye lahu mangenge tum se ḳhud pe itra.e ho kyon
ḳhushk hai dil ka kanval sanson men gham ki aag hai
jab barasna hi nahin hai badalon chha.e ho kyon
mai ke saghar hain agar gham ko miTane ka ilaaj
ai na.e mausam ke phulo pi ke murjha.e ho kyon
ab to ḳhamoshi tumhari ḳhaar si chubhne lagi
chup hi rahna tha batao phir yahan aa.e ho kyon
shab ki maari bastiyon ke har dar-o-divar par
dhuup to suraj ki hai tum ḳhud pe itra.e ho kyon
haath men hai haath mausam mast-e-gul mahke hue
dekhne par mere phir tum mujh se sharma.e ho kyon
ye hain aisi vadiyan dariya bhi hain jin ke sarab
log hain pyase yahan ‘asrar’ tum aa.e ho kyon
Leave a Reply