raten guzarne ko tiri rahguzar ke saath
ghar se nikal pada huun main divar-o-dar ke saath
dastak ne aisa hashr uthaya ki der tak
larzan raha hai jism bhi zanjir dar ke saath
kashkol thamte hain kaf-e-eatibar se
karte hain ham gadagari lekin hunar ke saath
ab kis tarah ye tokari sar pe uthaun main
suraj pada hua hai mire bam-o-dar ke saath
suraj usi tarah hai ye mahtab usi tarah
dhalte rahe hain yaar hi sham-o-sahar ke saath
yuun hai miri udaan pe bhari mira vajud
jaise zamin bandhi ho mire bal-o-par ke saath
‘tabish’ mujhe safar ki rivayat ka paas tha
so main bhi rah bana ke chala rahguzar ke saath
Leave a Reply