Shahzad Ahmad
ye kis gham se aqidat ho ga.i hai
gham-e-duniya se fursat ho ga.i hai
ham apne haal par ḳhud ro diye hain
kabhi aisi bhi halat ho ga.i hai
agar do dil kahin bhi mil ga.e hain
zamane ko shikayat ho ga.i hai
kahan main aur kahan alam-e-hasti
magar jiina to aadat ho ga.i hai
zara sa gham hua aur ro diye ham
baḌi nazuk tabi.at ho ga.i hai
ḳhabar kya ho jahan valon ki ham ko
unhen dekhe bhi muddat ho ga.i hai
sakun milne laga ‘shahzad’ mujh ko
taḌap jaane ki surat ho ga.i hai
Leave a Reply