Poet
mere liye hazar kare ehtimam hirs
main vo hon mujh pe daal sakegi na daam hirs
hai kuchh na kuchh har aadmi ko la-kalam hirs
lekin na is qadar ki bana le ghulam hirs
ai zulf phail phail ke rukhsar ko na dhank
kar nim-roz ki na shah-e-mulk-e-sham hirs
vaaiz sharab-o-hur ki ulfat men gharq hai
hai sar se paanv tak ye sitam-gar tamam hirs
dil chhin ashiqon ke magar hoshiyar rah
aisa na ho ki dil ko bana le ghulam hirs
naqis rahenge saare talavvun se karobar
karne na degi tujh ko yahan koi kaam hirs
qabza uthaegi na dil-e-rozgar se
jab tak na zindagi ka kare ikhtitam hirs
muddat se ishtiyaq hai bos-o-kanar ka
gar hukm ho shurua kare apna kaam hirs
‘parvin’ lagi hui hai khuda se mujhe umiid
dil ko mire banae na apna ghulam hirs
Leave a Reply