hayat ik saz-e-be-sada thi surud-e-umr-e-ravan se pahle
bashar ki taqdir so rahi thi ḳhata-e-bagh-e-jinan se pahle
nazar ne ki nazr-e-ruh-o-dil pesh-e-lab pe shor-e-fughan se pahle
ada hua sajda-e-mohabbat ḳharosh-e-bang-e-azan se pahle
badal gaya ishq ka zamana kahan se pahuncha kahan fasana
unhen bhi mujh par zaban aa.i vahi jo the be-zaban se pahle
kise ḳhabar thi ki ban ke barq-e-ghazab girega yahi chaman par
vo husn jo muskura raha tha naqab-e-abr-e-ravan se pahle
sitam to shayad main bhuul jaata agar ye nashtar chubha na hota
vo ik nigah-e-karam jo ki thi nigah-e-na-mehrban se pahle
nazar hai viran miri to kya gham nazar ke jalve to hain salamat
na the tum itne hasin miri mohabbat-e-ra.egan se pahle
tiri taraf phir nazar karunga nishat-e-hasti-e-javidani
ḳharid luun lazzat-e-alam kuchh mata-e-umr-e-ravan se pahle
bichhaḌ ga.e rah-e-zist men ham tumhen bhi is ka agar hai kuchh gham
chalen vahin se phir aao baham chale the ham tum jahan se pahle
qafas ki lohe ki tiliyan ab unhin ki zarbon se ḳhun-chakan hain
yahi jo the muntashir se tinke tasavvur-e-ashiyan se pahle
chaman men hansne se phir na rokunga ghuncha-e-sada-lauh tujh ko
magar zara ashna to ho ja tabi.at-e-baghban se pahle
nazar ke sho.ale dilon men ik aag har do janib laga chuke hain
bas ab to ye rah gaya hai baaqi ki lau uThegi kahan se pahle
na DhunDo ‘mulla’ ko karvan men phirega sahra men vo akela
kisi sabab se jo ta-ba-manzil na aa saka karvan se pahle
Leave a Reply