hai safar men karvan-e-bahr-o-bar kis ke liye
ho raha hai ehtimam-e-ḳhushk-o-tar kis ke liye
kis ki ḳhatir za.iqon ki saḳhtiyon men hain samar
aur jhuk jaati hai shaḳh-e-barvar kis ke liye
kis ki ḳhatir hain badalte mausamon ki barishen
dil ghamin kis ke liye hai chashm tar kis ke liye
rat-jagon men gunjne vaali sada.en kis ki hain
hai hunar kis ke liye arz-e-hunar kis ke liye
kis ne zaḳhm-e-na-rasi se bhar diye hain raste
charasazi kis liye hai charagar kis ke liye
la-makan men kaun rahta hai makan men kya nahin
dasht hain kis ke liye divar-o-dar kis ke liye
kis ne rakkhi hain har ik manzar men rangin sa.aten
ḳhalq farma.e ga.e hain be-basar kis ke liye
kaun sunta hai havaon ki ajab sargoshiyan
aur jaati hain hava.en dar-ba-dar kis ke liye
Leave a Reply