Tauba Ka Takalluf Kaun Kare Haalat Ki Niyyat Thik Nahin

Abdul Hamid Adam

tauba ka takalluf kaun kare halat ki niyyat thiik nahin

rahmat ka irada bigda hai barsat ki niyyat thiik nahin

ai shama bachana daman ko ismat se mohabbat arzan hai

aluda-nazar parvanon ke jazbat ki niyyat thiik nahin

kal qata taalluq kar lena is vaqt to duniya meri hai

ye raat ki qasmen jhuti hain ye raat ki niyyat thiik nahin

aisa nazar aata hai jaise ye shai mujhe pagal kar degi

thodi si tavajjoh bar-haq hai bohtat ki niyyat thiik nahin

raftar-e-zamana ka lahja saffak dikhai deta hai

bar-vaqt koi tadbir karo afat ki niyyat thiik nahin

mai-khane ki rasm-o-rah men bhi ho jaae na shamil khot kahen

khuddam fareb-amada hain khidmat ki niyyat thiik nahin

thoda sa kada gar dil ko karun adat badal to sakti hain

par asl musibat to ye hai adat ki niyyat thiik nahin

darta huun ‘adam’ phir aaj kahin shoala na uthe bijli na gire

barbat ki tabiat uljhi hai naghmat ki niyyat thiik nahin