chaḌhe jo dhuup tamazat se jism hanpte hain
jo din bujhe to sitaron se raat Dhanpte hain
andheri raat pur-asrar ghar makin chup-chap
muhib saa.e khuli khiḌkiyon men jhankte hain
ḳhayal-o-fikr ki taqvim men sar-e-aflak
diye jalate hain taare ufuq pe Tankte hain
shikan se lahje ki dil men daraḌ paḌti hai
so be-ruḳhi tere mathe ke bal se napte hain
shagun ke phuul jale surajon ke tasht men hain
ye kis ke aks hain jo aarsi men jhankte hain
jo zindagi ki hararat nahin sameT sake
vo gham-nazhad sabhi mausamon men kanpte hain
bahut buland uḌanon ki aarzu kab hai
hamare ḳhvab to chiḌiyon se pankh mangte hain
guzarta vaqt jinhen raste men chhoḌ gaya
vo umr bhar ke musafir hain ḳhaak phankte hain
Leave a Reply