hue hain ja ke ashiq ab to ham us shokh chanchal ke
sitamgar be-muravvat be-vafa be-rahm achpal ke
ghazalon ko tiri ankhen se kuchh nisbat nahin hargiz
ki ye aahu hain shahri aur ve vahshi hain jangal ke
giraftari hui hai dil ko mere be-tarah is se
ki aae pech men kahte hi un ki zulf ke bal ke
ye daulat-mand agar shab ko nahin yaaro to phir kya hai
ki hain ye chandni raton ko bhi muhtaj mishal ke
tumhare dard-e-sar se sandali-rango agar ji duun
tu chhape qabr par dena miri tum aa ke sandal ke
koi is ko kahe hai daam kui zanjir kui sumbul
hazaron naam hain kafir tiri zulf-e-musalsal ke
bayaban ban hamen ulfat nahin hai shahr se hargiz
tarah majnun ke ‘taban’ ham to divane hain jangal ke