dil ka mo.amla jo supurd-e-nazar hua
dushvar se ye marhala dushvar-tar hua
ubhra har ik ḳhayal ki tah se tira ḳhayal
dhoka tiri sada ka har avaz par hua
rahon men ek saath ye kyuun jal uThe charagh
shayad tira ḳhayal mira ham-safar hua
simTi to aur phail ga.i dil men mauj-e-dard
phaila to aur daman-e-gham muḳhtasar hua
lahra ke teri zulf bani ik hasin shaam
khul kar tire labon ka tabassum sahar hua
pahli nazar ki baat thi pahli nazar ke saath
phir aisa ittifaq kahan umr bhar hua
dil men jarahaton ke chaman lahlha uThe
‘muztar’ jab us ke shahr se apna guzar hua
Leave a Reply