Azra Naqvi
kisi ehsas men pahli si ab shiddat nahin hoti
ki ab to dil ke sannate se bhi vahshat nahin hoti
zamane-bhar ke gham apna liye hain khud-farebi men
khud apne gham se milne ki hamen fursat nahin hoti
guzar jaati hai saari zindagi jin ke taaqub men
bagule hain kisi bhi khvab ki surat nahin hoti
qasam khaai hai ham ne barha khamosh rahne ki
magar ghut-ghut ke rahne ki abhi aadat nahin hoti
use main agahi ka faiz samjhun ya saza samjhun
hamen duniya ki nairangi pe ab hairat nahin hoti
jahan par makr-o-fan adab-e-mahfil ban ke chhaya ho
hamen aisi kisi mahfil se kuchh nisbat nahin hoti
hazaron an-kahi baten jinhen likhne ko ji chahe
kabhi himmat nahin hoti kabhi fursat nahin hoti
Leave a Reply