har badalte hue manzar men raho
na.i uljhan na.e chakkar men raho
rabta ghar se rahe bahar ka
kisi rauzan ki tarah ghar men raho
rat-bhar sair karo duniya ki
rat-bhar apne hi bistar men raho
hadso dil men basa luun tum ko
saneho aao mire ghar men raho
har-nafas daftar-e-ehsas likho
har ghaḌi arsa-e-mahshar men raho
husn saḌkon ka tamasha Thahra
dosto dida-varo ghar men raho
kya qayamat hai ki tum ghair ke saath
mere hi ghar ke barabar men raho
ghar ke hangamon se fursat pa kar
baam par aao kabhi dar men raho
Leave a Reply