Liya Jannat Mein Bhi dozaKH Ka Sahaara Humne

Siraj Lakhnavi

liya jannat men bhi dozaḳh ka sahara ham ne

ashiyan barq ke tinkon se sanvara ham ne

husn-e-a.ina-e-ghairat ko sanvara ham ne

na liya ishq men apna bhi sahara ham ne

naqsh faani hi raha rang-e-baqa chaḌh na saka

umr bhar alam-e-imkan ko sanvara ham ne

har nafas marsiya tha sa.at-e-bedari ka

laakh soi hui qismat ko pukara ham ne

haa.e ai maslahat-e-vaqt duha.i teri

kar li na-ahl ki tanqid gavara ham ne

phir bhi peshani-e-tufan pe shikan baaqi hai

Dubte vaqt bhi dekha na kinara ham ne

dhaḌkanen dil ki bhi shahid hain ḳhuda bhi hai gavah

ham pe jab vaqt paḌa tum ko pukara ham ne

saya-e-gul men kahan fitrat-e-azad ko chain

har taḌapti hui bijli ko pukara ham ne