Tripurari
jaane phir us ke dil men kya baat aa ga.i thi
mujh ko gale laga kar vo ḳhud bhi ro paḌi thi
ham donon darmiyan se us raat haT chuke the
donon ke darmiyan bas ik paak raushni thi
jazbat ke samundar bechain ho rahe the
jab chand tha adhura jab raat sanvli thi
ik baat kahte kahte lab ḳhushk ho chale the
ankhon se ek naddi chup-chap bah chali thi
ankhon men ek chehra kuchh aise ghul raha tha
kajal pighal pighal kar tasvir ban ga.i thi
suraj nahin uga tha par raat Dhal chuki thi
doshizgi ka lamha ghunghaT men vo kali thi
Leave a Reply