ek muddat se adhura hai sarapa apna
gum hua jaane kahan bhiiḌ men chehra apna
meri ḳhvahish ke parinde ko qana.at hai pasand
sukhi Tahni pe hi karta hai basera apna
hirs caron ke ḳhazane ki hui hai jab se
ḳhair ḳhairat se bharta nahin kaasa apna
ham ne sikha hai gulabon se takallum ka tariq
khurdura ho nahin sakta kabhi lahja apna
hai to aalam ki ḳhabar apni ḳhabar ḳhaak nahin
ab tasavvur men hi khulta hai daricha apna
ukhḌi ukhḌi si lagavaT ko mohabbat na samajh
dhuup chamke to Thaharta nahin saaya apna
ek ik saans pe dete rahe jiine ka ḳhiraj
zindagi ne na kiya tark taqaza apna
adamiyat se muzayyan vo kitaben thiin subuk
aaj raddi se giran-bar hai basta apna
sirf ḳhvabon pe ijara tha haqiqat pe nahin
ham sarabon ko samajhte rahe dariya apna
koi ḳhil.at na inayat ki talab hai ‘sabir’
ham to likhte hain shab-o-roz qasida apna
Leave a Reply