Saud Usmani
ishq saman bhi hai be-sar-o-samani bhi
usi darvesh ke qadmon men hai sultani bhi
ham bhi vaise na rahe dasht bhi vaisa na raha
umr ke saath hi Dhalne lagi virani bhi
vo jo barbad hue the tire hathon vahi log
dam-ba-ḳhud dekh rahe hain tiri hairani bhi
aḳhir ik roz utarni hai libadon ki tarah
tan-e-malbus! ye pahni hui uryani bhi
ye jo main itni sahulat se tujhe chahta huun
dost ik umr men milti hai ye asani bhi
Leave a Reply